Rumah Panjai patut di “gazette” tanah endur berumah

Tang asai ke sama enggau bala mayuh mega, sama ngasai enggau nyepi pemedis tu ba raban bansa kitai ngelamatu. Berapa hari tu ke udah akuu berunding ka diri empu, sekali ka aku mantai ka anak penemmu diri enggau kita mayuh ba pekara tu tauka enda. Enda aku enda mantai ka anak penemu ke menggal mit asai ka nesal ga dalam jungkal dabung ati, ngagai bala kitai sebuat.

Dikenang sereta dibantai ka ba randau tu ditu,asai ke tak baka ke lebih sereta nemu ari orang mayuh. Nya alai, sebedau ngenang sereta ngara ka randau tu ke ujung agi, aku deka empelas mua diri dulu. Ent nyema kenang aku tu lagi nya bisi tinggi dinga sereta diperatika kita mayuh, arap ka kita mapal iya, lalu bakanya mega enti nyema randau enggau pekara ke dikenatai ka aku tu lagi baruh arapka kita manggal iya.

Ngenang pasal 5-buah rumah panjai ke dipindah ka kompeni tauka perintah....nya isu tauka batang randau kitai ba tu. Nyadi sebdau madah ka kebuah enggau rampa pangka ubah pemansang dunya. Dulu aku mai kitai berati ka semua rumah panjai di serata menua Sarawak. Bisi kitai nemu berapa buah rumah panjai di serata menua Sarawak. Nyadi semua Rumah panjai kitai Iban, endang ngachir pendiau enggau betumpuk...bakanya mega rumah raban bansa Bidayuh,Selako, Berawan, Penan, Punan, Kelabit, Kayan, Kenyah enggau raban bansa Dayak ke bukai.

Dikira pukul rata RIBU rumah panjai di serata menua sarawak tu. Lalu dibanding ka gaya pemesai Tanah Temuda tauka tanah Asal raban bansa Dayak diserata menua Sarawak tu. Ko penemu raban bansa kitai,....KITAI EMPU TANAH NYA... tang iya ke bendar nama nadai pala sigi tanah perintah udah bekau Undang undang tanah Pesaka ke diubah Dalam Aum Council Negeri ke dulu agi ari tu. Siti agi tanya kitai ngagai kitaiempu kelebih agi kitai ke diau di rumah panjai. Kati ko Tanah ke endur tua berumah nya dah digazzette nyadi tanah endur berumahh, tauka tanah endur berumah nya tanah temuda tauka tanah pesaka tauka bisi pala? Nya tanya ke patut ditanya genap iku Tuai Rumah di serata menua Sarawak.

Tebal agi Rumah Panjai Iban di Sarawak nadai udah digazzete nyadi tanah endur berumah. Tebal agi Tanah endur kitai niri ka rumah panjai Tanah Temuda, Tanah Pesaka ke enda bepala, Tanah Orang pindah, Tanah ke bisi orang empu ba penemu kitai di menua. Tang ba Undang -undang perintah kitai niri ka rumah panjai ba Tanah Perintah. Nya alai, dalam Ubah undang-undang Tanah nya kemari endang bisi lebas ke meri peluang ngagai Tuai Rumah genap iti rumah panjai ngenatai ka peminta ngagai Perintah.

Naka ke diatu naka dua tiga iku Tuai Rumah bisi ngenatai ka pemintta nya ngagai perinttah...laban kitai nyangka ketegal enda nemu...tauka enggai kiruh...selalu ngumbai tanah nya enggi Kitai tauka ngembuan ati ke bingking. Ari ketegal semua nya ttadi...kitai empu ke tulih ka penusah lebuh orang mindah ka kitai. Naka ke ditemu aku, chara kena kitai, ngenatai ka peminta nya endang meruan ba Opis Sukat enggau Survey, sereta mega ba Opis DO enggau Opis Residen. Pekara tu bisi dikenang sereta dikenatai ka aku rambau pengawa bepilihke tu kemari.

Bala Tuai Rumah...enda peduli ka sekeda pekara ke dikenang akku dulu agi ari tu. Kitai enda olih nganu sereta ngutuk sapa-sapa, laban ke patut sereta ke bendar kitai empu ngadu ka diriempu..nitih ka gaya ubah undang-undang ke dikena ba menua Kitai. Tebal agi Kampung Bidayuh udah bisi ngenatai ka peminta sida Kira 80%kampung Bidayu udah Digazzete nyadi Tanah endur Berumah. Bakanya mega Raban Bansa Melayu udah ngenatai ka pemintta sida ngagai Perintah. 90% kampung melayu dah ngenatai ka pemintta sida. Kitai Iban semina, enti bisi 5% udah ngenatai ka peminta. Ari 80% Kampung Bidayuh udah ngenatai peminta 70% udah dikemendar ka, lalu Kampung Melayu 85% udah dikemendar ka lalu engga Iban semina 3% udah dikemendar ka perintah.

Nya alai pekara ke bansa tu ukai nyadi Isu lebuh maya bepilih sereta ukai isu ke patut ngemedis kitai...kitai diatu jaku nyebut mayuh dah bala pandai..tangenda ngena subuk betanya ngagai Opis Perinah ngiga jalai enggau chara ngatur pendiau raban kitai di menua Pesisir. Nya alai awak ka bala mayuh ditu nemu chara ngenattai ka peminta:

Bisi dua chara ngenatai ka peminta..siti nya nulis surat kadiriempu lalu siti nya endang meruan Pom di isi ba Opis DO tauka Opis Tanah enggau Survey. Pom nya dikumbai kena mintta Tanah endur berumah udah nya lalu di classified sida Land Survey nyadi Communal Land, lalu ba Kar menua dia iya lalu diengkah ka sida Land Survey OT ( Occupational Ticket ) Enti udah bisi nya, nadai orang ulih ngachau sereta mindah ka rumah kitai. Enti bisi berandau sereta seminar anang ninggal ka pengari ari Opis Tanah enggau Sukat datai meri penerang ngagai kitai di Rumah panjai.

Ukai semina ngenang utai ke bedau datai ba raban bansa kitai..berandau ka chara enggau jalai ngadu ka utai ke endang udah dikembuan kitai. Nadai salah mega kitai berandau ka jalai enggau chara ngemansang ka raban bansa kitai tang nya kelalu besai...baka pipit deka nelan leka embawang. Awak ka orang ke endang relevan aja ngereja pengawa ke relevan ka siti siti pengawa enggau tuju iya.

Genap iku kitai endang bisi ungkup pengawa kadiriempu ke patut dikereja ka perintah enggau raban bansa kitai empu tauka society as a whole, tang enda semua pengawa enggau tanggungjawab nya dikereja kitai magang. Uji kitai bebagi ngereja pengawa tang tuju ngagai siti jalai.. JULUK TI SEBAKA